“ომიკრონის” დომინანტობის ფაზაში საბერძნეთში ვაქცინაციის სერთიფიკატების ვადებთან და კოვიდით დაავადების სერთიფიკატების გაცემასთან დაკავშირებით ცვლილებებია.
არსებული ინფორმაციით, იცვლება კორონავირუსით დაავადების დამადასტურებელი სერთიფიკატის გაცემის გზა:
– თუ ვაქცინირებული ხართ, საკმარისია სწრაფი (Rapid) ტესტის დადებითი პასუხი იმისთვის, რომ დაავადების სერთიფიკატი აიღოთ.
– თუ ვაქცინირებული არ ხართ, საჭიროა ჩაიტაროთ მოლეკულური, PCR, ტესტი იმისთვის, რომ კოვიდით დაავადების დამადასტურებელი დოკუმენტი აიღოთ.
კოვიდით დაავადების სერთიფიკატი გაიცემა:
აუცრელებისთვის, კოვიდის პირველი დადებითი პასუხის გამოსვლიდან 14 დღის მანძილზე PCR ტესტის ჩატარების საფუძველზე (თუ იქამდე ჩატარებული იყო სელფ-ტესტი ან სწრაფი ტესტი (Rapid).
სრულად ვაქცინირებულების შემთხვევაში, როგორც უკვე აღვნიშნეთ, სწრაფი ტესტის ჩატარების საფუძველზე.
სერთიფიკატის მოქმედების ვადაა 90 დღე, 180-ის ნაცვლად, როგორც ადრე იყო ძალაში, ანუ მისი გამოყენება სამოგზაუროდ და სხვა მიზნებისთვის შესაძლებელია მხოლოდ სამი თვის მანძილზე.
რაც შეეხება ვაქცინაციის სერთიფიკატს, 60 წელს ზემოთ ასაკის ადამიანებისთვის ძალა მხოლოდ 7 თვის მანძილზე აქვს, თუ მე-3 დოზას არ მიიღებენ, ხოლო ჯანდაცვის მინისტრი აცხადებს, რომ აღნიშნული გადაწყვეტილება მიიღება უახლოეს მომავალში მთელ მოსახლეობაზე.
ამრიგად, ოფიციალური გადაწყვეტილების მიღების შემდეგ, ნებისმირი ასაკის ადამიანი ჩაითვლება აუცრელად, თუ მეორედ აცრიდან 7 თვეში მე-3 დოზას არ მიიღებს.
