მარტის დასაწყისიდან საბერძნეთში 1.500 პროდუქტი გაიაფდება – კირიაკოს მიცოტაკის განცხადება
საბერძნეთის პრემიერ-მინისტრმა, კირიაკოს მიცოტაკიმ მინისტრთა საბჭოზე იმ ზომებზე ისაუბრა, რომელთა მიღების შედეგადაც საბერძნეთში მარტის პირველი რიცხვებიდან ასობით პროდუქტი გაიაფდება, უფრო სწორად რომ ვთქვათ, დაუბრუნდება საწყის ფასებს.
პრემიერის განცხადებით, საუბარია 1,500-მდე პროდუქტზე, რომელთა შეძენაც პირვანდელი ფასებით იქნება შესაძლებელი და ხაზი გაუსვა, რომ მთავრობა ორიენტირებული უნდა იყოს ეკონომიკის, მდგრადი განვითარების, განკარგვადი შემოსავლის, ჯანმრთელობისა და უსაფრთხოების საკითხებზე.
“ინტერვენციების შედეგები გამოჩნდება ნელ-ნელა, რადგან ეს არის ღრმა სტრუქტურული ინტერვენცია ბაზრის ფუნქციონირების გზაზე. თუმცა, პირველი შეფასებები საკმაოდ ოპტიმისტური და გამამხნევებელია და ველოდებით, რომ პროდუქტების ფასები დაუბრუნდეს საწყის მაჩვენებელს – ვიმეორებ, რომ მარტის დასაწყისიდან 1,500-სზე მეტი პროდუქტი გაიაფდება.
რა თქმა უნდა, ჩვენ ვაგრძელებთ ბრძოლას მოსახლეობის შემოსავლის გასაზრდელად, ერთის მხრივ პენსიების, მეორეს მხრივ კი, ხელფასების ზრდის საშუალებით.
1-ლი აპრილიდან, როგორც უკვე იცით, საბერძნეთში მინიმალური ხელფასი იზრდება და ჩვენი მთავრობის პირობებში ზრდა განხორციელდა რამდენიმეჯერ. ეს არის ჩვენი პასუხი ინფლაციისა და სიძვირის ტალღაზე, თუმცა, ზომები ხორციელდება არსებული შესაძლებლობებიდან გამომდინარე,” აცხადებს მიცოტაკი.