კირიაკოს მიცოტაკიმ მთავრობის მიერ მიღებული გადაწყვეტილება საზოგადოებას გააცნო. აღნიშნული გადაწყვეტილების მიხედვით, საბერძნეთში 18-დან 25 წლამდე ახალგაზრდებს გადაეცემათ ბარათი, 150 ევროს ბალანსით, თუმცა, ეს განსაზღვრულია მხოლოდ მათთვიც, ვინც გაიკეთა ვაქცინის 1-ლი დოზა ან გაიკეთებს 2021 წლის მანძილზე.
აღნიშნული ბარათის გამოყენება შესაძლებელი იქნება შემდეგი მიზნებისთვის: სამოგზაურო ბილეთების შეძენა, სასტუმროს გარკვეული ხარჯის დაფარვა, კინოების, კონცერტებისა და თეატრების ბილეთების შეძენა. ანუ ფაქტობრივად, ტურისტული და გასართობი მიზნებისთვის.
ბარათს 18-დან 25 წლამდე ახალგაზრდები მიიღებენ ავტომატურად, ΑΜΚΑ-ს საშუალებით, თუკი ვაქცინას 2021 წელს გაიკეთებენ ან უკვე გაიკეთეს.
რაც შეეხება ვაქცინირებულთა სხვა პრივილეგიებს, ოფიციალური ინფორმაცია მომდევნო დღეებში გამოქვეყნდება, თუმცა, პრემიერმა წინასწარ განაცხადა, რომ მათ მეტი თავისუფლება ექნებათ, განსაკუთრებით, დახურულ სივრცეებში.
