აღნიშნულ სტატიაში წარმოგიდგენთ ყველა იმ ინფორმაციას, რომელიც დღევანდელ დღესთან დაკავშირებით უნდა იცოდეთ. აქ თავმოყრილია ცნობები ტრანსპორტის მოძრაობის, დაკეტილი გზებისა და იმ დაწესებულებების შესახებ, რომლებიც 28 ოქტომბერს არ მუშაობს.
კერძოდ, ტრანსპორტის გადაადგილება 28 ოქტომბერს აკრძალული იქნება დილის 09:00 საათიდან შემდეგ ქუჩებზე:
ვასილისის ამალიას (მთელ სიგრძეზე)
ელ. ვენიზელუ (პანეპისტიმიუ) მთელ სიგრძეზე და პარალელურ ქუჩებზე
ვასილისის სოფიას გამზირი
სიგრუს გამზირის ნაწილი, დიაკუსა და დიონისიუ არეოპაგიტუს ქუჩებს შორის
მიტროპოლეოს მთელ სიგრძეზე
ვასილისის ოლგას
ვასილისის გეორგიუ
სინდაღმა
იროონ პოლიტეხნიუ.
გაითვალისწინეთ, რომ აღნიშნულ ქუჩებსა და გამზირებზე საჯარო ტრანსპორტი არ იმოძრავებს.
მეტროსადგური “სინდაღმა” დაიკეტა 08:00 საათიდან და მატარებლები ჩაივლიან გაჩერების გარეშე. სადგური დაკეტილი დარჩება იქამდე, ვიდრე პოლიცია მისი გახსნის ბრძანებას არ გასცემს, ეს სავარაუდოდ, მოხდება მარშის დასრულების შემდეგ.
ტრამვაის მე-6 ხაზის, “პიკროდაფნი-სინდაღმა”, ბოლო გაჩერება დროებით იქნება სადგური “ფიქს”.
ტრამვაის მე-7 ხაზის, “ასკლიპიიუ ვულას-აგია ტრიადა პირეა”, ბოლო გაჩერება დროებით იქნება “სეფ” .
აღნიშნული ტრანსპორტის მოძრაობის ჩვეულ რეჟიმში აღდგენაც მოსალოდნელია მარშის დასრულების შემდეგ.
28 ოქტომბერს საბერძნეთში სუპერმარკეტები დაკეტილი იქნება, რადგან თანამშრომლებისთვის ეს ოფიციალურად დასვენების დღეა. ვინაიდან შემდეგ კვირა დღე მოსდევს, ისინი მუშაობას განაახლებენ ორშაბათს, 30 ოქტომბერს.
დაკეტილი იქნება ასევე კომერციული მაღაზიები, სილამაზის სალონები და თავის მოვლის სხვა დაწესებულებები.
ჩვეულ რეჟიმში იმუშავებენ მინი-მარკეტები, საცხობები, სარესტორნო სფეროს დაწესებულებები: კაფეები, ბარები, რესტორნები და ა.შ.
