დიდ დიღომში მომხდარ ტრაგედიასთან დაკავშირებით საქართველოს პრემიერ-მინისტრმა მამუკა ბახტაძემ 17 იანვარი გლოვის დღედ გამოაცხადა.
იტალიის საელჩო საქართველოში და ლიეტუვის საგარეო საქმეთა მინისტრი ლინას ლინკევიჩუსი თბილისში მომხდარი ტრაგედიის გამო მწუხარებას გამოთქვამენ და გარდაცვლილთა ოჯახებს სამძიმარს უცხადებენ, იუწყება საზოგადოებრივი მაუწყებლის პირველი არხი.
აფეთქება დიდ დიღომში, ავთანდილის ქუჩაზე გუშინ საღამოს მოხდა. მომხდარის შედეგად ოთხი ადამიანი გარდაიცვალა, დაშავებულია რვა ადამიანი, მათ შორის, ბავშვები.
დიდ დიღომში საცხოვრებელი კორპუსის მეექვსე სართულზე აფეთქება, სავარაუდოდ, ბუნებრივი აირის გაჟონვამ გამოიწვია.
„ჩვენი სამძიმარი საქართველოს და თბილისში მომხდარი საშინელი აფეთქების შედეგად დაზარალებულ ოჯახებს”, – ნათქვამია დიპლომატიური მისიის მიერ სოციალურ ქსელში გავრცელებულ განცხადებაში.
მომხდარის ტრაგედიის გამო საქართველოს მოსახლეობას სამძიმარს უცხადებს ლიეტუვის საგარეო საქმეთა მინისტრი ლინას ლინკევიჩუსი.
ლიეტუველი დიპლომატი მწუხარებას გამოთქვამს მომხდარი ტრაგედიის გამო, უსამძიმრებს აფეთქების შედეგად გარდაცვლილთა ახლობლებს და დაშავებულებს გამოჯანმრთელებას უსურვებს.
Our profound sympathies go out to the people of #Georgia following deadly gas explosion in Tbilisi. Deepest condolences to the loved ones of the victims, full and speedy recovery to all the injured. @DZalkaliani
მთავრობის განკარგულების თანახმად, გლოვის დღესთან დაკავშირებით, საქართველოს ტერიტორიაზე ყველა ადმინისტრაციულ შენობაზე და საზღვარგარეთ საქართველოს დიპლომატიურ წარმომადგენლობებზე სახელმწიფო დროშებია დაშვებული.
აფეთქების მიზეზი, წინასწარი ინფორმაციით, ბუნებრივი აირის გაჟონვა გახდა. ადგილობრივი მცხოვრებლების განცხადებით, მთელი დღის განმავლობაში ბუნებრივი აირის სუნი იგრძნობოდა, თუმცა, ადგილზე მისულმა გაზგამანაწილებელი კომპანია „ყაზტრანსგაზის” თანამშრომლებმა ვერ აღმოაჩინეს ვერანაირი ხარვეზი.
მომხდარზე გამოძიება საქართველოს სსკ-ის 240-ე პრიმა მუხლის მე-3 ნაწილით დაიწყო, რაც მშენებლობის ან ექსპლუატაციის დროს უსაფრთხოების წესების დარღვევას გულისხმობს, რომელსაც ორი ან მეტი ადამიანის სიცოცხლის მოსპობა მოჰყვა. დამნაშავეებს 6-დან 10 წლამდე ვადით თავისუფლების აღკვეთა ემუქრებათ.
