13 წლის გოგონა, რუსთავში, ლეონიძის ქუჩაზე საცხოვრებელი კორპუსის სახურავიდან გადმოვარდა. იგი მიღებული მძიმე დაზიანებების შედეგად ადგილზე გარდაიცვალა.
როგორც მედიისთვის გახდა ცნობილი, გოგონა რუსთავში კერძო სკოლა “რეცაში” სწავლობდა. ის მამასთან ერთად ცხოვრობდა, დედა კი იტალიაში სამუშაოდ იყო წასული. ლიზის გარდაცვალების შესახებ ოჯახის წევრებმა დედას შეატყობინეს და ის საქართველოში დღეს ჩავიდა.
კორპუსის მცხოვრები, სადაც შემთხვევა მოხდა, იხსენებს, რომ დაახლოებით 13:30 წუთზე სადარბაზოს კიბეებს გვიდა, რა დროსაც იქ ორი უცხო გოგონა შევიდა.
“როგორც გავიგეთ, გოგონა მეზობელ კორპუსში ცხოვრობდა. როდესაც აქ შემოსულები დავინახე, ვკითხე, ვისთან მიდიოდნენ, უცხო სახელი მითხრეს, ასეთი ამ სადარბაზოში არავინ ცხოვრობს. დაახლოებით 10 წუთში საშინელი ტრაგედია დატრიალდა. გარდაცვლილში სწორედ ზევით მიმავალი გოგონებიდან ერთ-ერთი ამოვიცანი” – ამბობსკორპუსის მცხოვრები.
არსებული ინფორმაციით, არასრულწლოვანი კორპუსის სახურავზე მეგობრებთან ერთად სავარაუდოდ, ფოტოების გადასაღებად ავიდა, რა დროსაც უბედური შემთხვევა მოხდა. ლეონიძის ქუჩის კიდევ ერთი მაცხოვრებელი აცხადებს, რომ სახურავის კიდეზე ჩაცურებული ფეხსაცმლის კვალი ჩანს.
ლიზის დედამ, მას შემდეგ რაც ტრაგედიის შესახებ შეიტყო, სოციალურ ქსელში დაწერა :
დამელოდეეე დეეეე მოვდივარ!!!
გარდაცვლილის მეგობრები უარყოფენ გავრცელებულ ინფორმაციას იმის შესახებ, რომ საცხოვრებელი კორპუსის სახურავზე, საიდანაც მოზარდი გადმოვარდა შესაძლებელი იყო კონფლიქტს ჰქონოდა ადგილი, რადგან მათი თქმით, გარდაცვლილი მშვიდი და უკონფლიქტო ბავშვი იყო. მათივე თქმით, რეალობას არ შეესაბამება ის მოსაზრება, რომ გოგონას სუიციდისკენ ჰქონდა მიდრეკილება, რადგან მათ მეგობრის მხრიდან თვითმკვლელობის მცდელობის ფაქტი არ ახსოვთ.
