საბერძნეთში უფრო და უფრო მეტი წყვილი ურთიერთობისთვის სტატუსის მისაცემად ნოტარიუსს მიმართავს. მათ ურჩევნიათ თანაცხოვრებაზე შეთანხმდნენ და საკუთარ თავზე პასუხი თავად აგონ, ვიდრე ტრადიციულად და ეკლესიურად დაქორწინდნენ.
”Καθημερινή”-ის ინფორმაციით, რეესტრში არსებული მონაცემები ამტკიცებს, რომ თანაცხოვრების ტენდენცია ბევრად მეტია, თუმცა, ტრადიციულ ქორწინებასაც თავისი პოზოცია უკავია – ყოველწლიურად 50, 000-ზე მეტი ცერემონია ფიქსირდება.
მხოლოდ 2017 წლის პირველ მეოთხედში თანაცხოვრების შესახებ შეთანხმებას 1,100-მა წყვილმა მოაწერა ხელი, მოსალოდნელია, რომ ეს რიცხვი წელს 10%-15%-ით გაიზრდება.
კერძოდ, ქალაქ ათენში აღნიშნულ შეთანხმებას ჯამში 450-მა, როგორც ჰეტეროსექსუალმა, ასევე ჰომოსექსუალმა წყვილმა მოაწერა ხელი. ეს ორჯერ მეტია, 2016 წელს დაფიქსირებულ მაჩვენებელთან შედარებით.
ELSTAT-ის მიხედვით, 2013 წელს თანაცხოვრების 482 შეთანხმება შედგა, 2014 წელს ამ რიცხვმა 1,568-ს მიაღწია, 2015 წელს 2,535-ს, ხოლო 2016 წელს 3,678-ს.
