პრემიერი: საზღვარგარეთ მყოფი თანამემამულეების ჩართულობის საკითხი მეტ ყურადღებას საჭიროებს

ამის შესახებ საქართველოს პრემიერ-მინისტრმა გიორგი კვირიკაშვილმა პარლამენტის პლენარულ სხდომაზე, დეპუტატ სალომე ზურაბიშვილი სმიერ დასმული კითხვის საპასუხოდ განაცხადა.

“არ მინდა, ზოგადი პოლიტიკური პასუხი გაგცეთ. მზად ვარ, განვიხილოთ თქვენთან ერთად გზები, როგორ შევქმნათ იმ ადამიანებზე მორგებული პროგრამები, რომლებმაც ოდესღაც ჩვენი ქვეყანა დატოვეს. ისინი გამორჩეული სამეწარმეო სულისკვეთების ადამიანები არიან. ჩვენი პრიორიტეტია მათი დაბრუნება. ეს არიან ადამიანები, რომლებსაც ასევე განსაკუთრებული ნიჭი აქვთ კულტურის, სხვა მიმართულებებით. ძალიან მნიშვნელოვანია, ისინი წარმატებულნი იყვნენ იქ, სადაც არიან, მაგრამ ჩვენი ქვეყნის აღმშენებლობაში მათი ჩართულობა იყოს მნიშვნელოვანი. მუდმივი კონტაქტი გვაქვს მათთან, მათ შორის ქართული ენის სწავლების კუთხით, შესაბამისი სტრუქტურები ქვეყანაში არსებულ პროგრამებს მათ სისტემატურად აცნობენ. ბევრი ადამიანი დაბრუნდა სპეციალურად ამ პროგრამების გამოსაყენებლად, მათ აქ გააკეთეს ბიზნესი ახლობლებისთვის და დაუბრუნდნენ სამუშაოს. თუმცა, მიუხედავად იმისა, რომ არსებობს არაერთი პროგრამა, მათ შორის სტარტაპების ხელშესაწყობად, არც ერთი ასეთი პროგრამა არ არის სპეციალურად მორგებული საზღვარგარეთ მცხოვრებ ჩვენს თანამემამულეებზე. ვისურვებდი, რომ შეგვექმნა სპეციალურად მათზე მორგებული პროგრამები და მივესალმები თქვენს წინადადებას ამ მიმართულებით”, – განაცხადა გიორგი კვირიკაშვილმა.

პრემიერმა ასევე უპასუხა სალომე ზურაბიშვილის კითხვის იმ ნაწილს, რომელიც მცირე და საშუალო ბიზნესის ხელშეწყობას ემსახურება და ისაუბრა სახელმწიფო პროგრამებზე, რომელთაშორისაა “აწარმოე საქართველოში”, “უმასპინძლე საქართველოში”, “შეღავათიანი აგროპროექტი” და ა.შ.

“თუმცა, ვფიქრობ, ახალი ტალღაა საჭირო მცირე და საშუალო ბიზნესის მხარდასაჭერად და ალბათ ამ მიმართულებით მეტის გაკეთება შეიძლება”, – განაცხადა გიორგი კვირიკაშვილმა.