კიფისოს გამზირზე მომხდარი საზარელი ავარიის მიზეზი სატვირთოს მძღოლის სიმთვრალე გახდა, რომელმაც საჭეზე კონტროლი დაკარგა და საპირისპირო გზაზე გადავიდა. შედეგად, ორი მსუბუქი ავტომობილი დაეჯახა და შიგ მსხდომი 3 ადამიანი გარდაიცვალა, 2 მამაკაცი ადგილზე, ხოლო ერთი ქალი მოგვიანებით, საავადმყოფოში.
რას ამბობს მძღოლი, რომელიც სატვირთოს მართავდა?! ის ამ დრომდე პერისტერის პოლიციის განყოფილებაში იმყოფებოდა. 64 წლის მამაკაცი ჩვენებას აძლევს:
“მეგობრის სახლში ვიყავი და ვერთობოდით. შემდეგ სხვა მძღოლმა დამირეკა და მთხოვა, მის ნაცვლად რეისზე მე წავსულიყავი. დავთანხმდი, მიუხედავად იმისა, რომ ღვინო მქონდა მირთმეული, თავს ფხიზლად ვგრძნობდი. 60 კმ/სთ სიჩქარით მივდიოდი.”
პოლიციის მიერ ჩატარებული გამოძიების შედეგად, აღმოჩნდა, რომ მამაკაცს სხვა დარღვევებიც აქვს. 2018 წლის 18 თებერვალს ის იგივე სატვირთოს კვლავ ნასვამ მდგომარეობაში მართავდა.
64 წლის მამაკაცს შემდეგი დანაშაულებისთვის გაასამართლებენ:
– ავტოსაგზაო (უსაფრთხოების) დარღვევა
– მკვლელობა
– გარკვეული დაზიანებები უყურადღებობის ფონზე
– სერტიფიკატის უკანონოდ გამოყენება
– მანქანის მართვა ალკოჰოლის ზემოქმედების ქვეშ ბოლო ორი წლის მანძილზე რამდენჯერმე.
